Bədəlov Elman Kərim oğlu (04.06.1929, Ağdam r-nu - 25.06.1991, Bakı)
- kamança ifaçısı. Azərbaycan əməkdar artisti (1982). Gənc yaşlarından musiqi ilə məşğul olmuş, tar və kamança alətlərində məharətlə çalmışdır. Ağdam Dövlət Dram Teatrının tamaşalarında, konsertlərdə çıxış etmiş, Azərbaycan gənclərinin II festivalının laureatı olmuşdur (1957). Bununla yanaşı, Ağdam Pedaqoji Məktəbində fizika-riyaziyyat sahəsində təhsil almış və müəllim kimi çalışmışdır (1947-1951).
Professional musiqi təhsilini A.Zeynallı ad. ADMM-da (1957-1961) və ADK-da (1975-1980) almışdır. 1958 ildən ömrünün sonuna kimi AzRTV QSC S.Rüstəmov ad. X.Ç.A. orkestrinin solisti və kamança qrupunun konsertmeysteri olmuşdur. E.Bədəlov solo ifaçı və muğam üçlüyünün tərkibində konsertlərdə çıxış etmiş, bir çox ölkələrdə (Türkiyə, Yaponiya, Danimarka, İsveç, Norveç və s.) qastrol səfərlərində, beynəlxalq musiqi festivallarında olmuşdur.
E.Bədəlovun ifasında “Şur”, “Segah”, “Şüştər”, “Rəhab”, “Nümayun”, “Bayatı-Şiraz”, “Rast” və b. instrumental muğamlar AzRT Fondunda saxlanılır. Sənətkarın ifasında bu muğamlar həzinliyi, emosionallığı, dərinliyi, improvizasiya ustalığı ilə seçilir. E.Bədəlov pedaqoji fəaliyyətlə məşğul olmuş, Bülbül ad. OİMM-də və ADK-da dərs demişdir. Yetirdiyi çoxsaylı tələbələri - Ədalət Vəzirov, Ağacəbrayıl Abasəliyev, Yaqut Seyidova və b. onun ifaçılıq ənənələrinin davamçılarıdır.