Car-Balakən camaatlığı
Azərbaycanın şimal-qərbində yerləşirdi. Tərkibinə Car, Balakən, Katex, Tala, Muxax və Cənik camaatlıqlarında birləşən kəndlər daxil olub. Camaatlıq 1803-cü ildə Rusiya tərəfindən işğal olunub.
Ərəş sultanlığı
Ərəş sultanlığı indiki Yevlax və Ağdaş rayonlarının bir hissəsini, Mingəçevir şəhərinin ərazisini əhatə edirdi. XVIII əsrin 50-ci illərində Şəki xanlığının vassalına çevrilib. 1795-ci ildə Ərəş sultanlığı ləğv edilib və mahal olaraq xanlığa qatılıb.
İlisu sultanlığı
XVI əsrin II yarısında yaranan sultanlıq XIX əsrin ortalarına kimi fəaliyyət göstərib. Mərkəzi İliusu olub. Sultanlıq şimaldan və şərqdən Qafqaz dağları, qərbdən Qanıq çayı, cənub-şərqdən Şəki xanlığı ilə həmsərhəd olub. 1807-ci ildə Rusiyaya tərəfindən işğal olunub. 1830-cu ildə Car-Balakən inzibati dairəsinə düşüb. 1840-cı illərdə İlisu sultanlığının ərazisi Gürcüstan-İmeretiya quberniyasına daxil edilib. 1844-cü ildə ləğv olunub.
Qarabağ məlikləri
Dizaq məlikliyi
Orta əsrlərdə Qarabağın kiçik feodal hakimliyi olmuşdur. Səfəvilər dövründə Qarabağ bəylərbəyliyinin, XVIII əsrin ortalarından Qarabağ xanlığının tərkibinə daxil olub. 1813-cü ildə Qarabağın tərkibində Rusiyaya ilhaq edilmişdi.
Gülüstan məlikliyi
Mərkəzi əvvəllər İncəçayın yuxarı hövzəsindəki Talış kəndi, sonralar Gülüstan qalası olan məliklik Səfəvilər dövründə Qarabağ bəylərbəyliyinin, sonra isə Qarabağ xanlığının tərkibində olub. 1813-cü ildə xanlıqla birlikdə Rusiyaya ilhaq olunub.
Vərəndə məlikliyi
Orta əsrlərdə Qarabağın dağlıq hissəsində yaranıb. Səfəvilər dövründə Qarabağ bəylərbəyliyinə daxil olub. XVIII əsrin ortalarında Qarabağ xanlığına birləşdirilib.
Xaçın məlikliyi
XII əsrdə Qarabağın dağlıq hissəsində yaranıb və yerli alban hakimləri tərəfindən idarə olunub. Səfəvilər dövründə Qarabağ bəylərbəyliyinin, XVIII əsrin ortalarında isə Qarabağ xanlığının tərkibində olub. 1813-cü ildə həmin xanlığın tərkibində Rusiyaya ilhaq olunub.
Crabert məlikliyi
Orta əsrlərdə Qarabağın dağlıq hissəsində yaranmış kiçik feodal dövləti olub. Mərkəzi Crabert qalası olan məliklik Səfəvilər dövründə Qarabağ bəylərbəyliyinin, XVIII əsrin II yarısında isə Qarabağ xanlığının tərkibinə qatılıb. 1813-cü ildə xanlığın tərkibində Rusiyaya ilhaq olunub.
Qazax sultanlığı
Azərbaycanın şimal-qərbində yaranan sultanlıq Səfəvilər dövründə Qarabağ-Gəncə bəylərbəyliyinin tərkibinə daxil olub. Qazaxlar irsi hakimiyyətə malik olublar. Nadir şah tərəfindən Kartli çarı Teymurazın tabeliyinə verilən Qazax sultanlığı 1752-ci ildə Şəki xanlığının tərkibində olsa da, 1801-ci ildə Kartli-Kaxetiyanın tərkibində Rusiyaya birləşdirilib. Sultanlıq 1819-cu ildə ləğv edilib.
Qəbələ sultanlığı
XVIII əsrin ortalarında yaranıb. Onun ərazisi şimaldan Böyük Qafqazın cənub yamacı, şərqdə Göyçay, qərbdə Əlican çayı ilə əhatə olunurdu. Şəki xanlığına daxil olub. XVIII əsrin sonlarından Qəbələ mahalı adlanıb. Şəki xanlarının naibləri tərəfindən idarə olunurdu.
Şəmşəddil sultanlığı
Zəyəm mahalı və ondan qərbdəki ərazidə yaranan Şəmşəddil sultanlığının ərazisi Şah I İsmayılın dövründən Zülqədər tayfasının bir qolu olan Şəmşəddil tayfasının irsi vilayəti hesab olunurdu. 1743-cü ildə Nadir şah tərəfindən Kartli çarı Teymurazın tabeliyinə verilib. Sonralar onun ərazisi Qazax ilə birləşdirilib və Qazax-Şəmşəddil sultanlığı adlanıb. 1801-ci ildə Kartli-Kaxetiyanın tərkibində Rusiyaya birləşdirilib. 1819-cu ildə isənləğv edilib.