Eldar Məcidov
Azərbaycan Respublikası Prezidentinin 16 sentyabr 1994-cü il tarixli 202 saylı fərmanı ilə Məcidov Eldar Tofiq oğluna ölümündən sonra "Azərbaycanın Milli Qəhrəmanı" adı verilmişdir.
Məcidov Eldar Tofiq oğlu 26 avqust 1965-ci ildə Bakı şəhərində anadan olub.
1982-ci ildə 52 saylı orta məktəbi bitirmişdir. Həmin ildə Azərbaycan Rəssamlar İttifaqının Bədii Fondunda işə düzəlir.
1983-cü ildə hərbi xidmətə çağırılır. Hərbi xidməti Almaniyada keçən Eldar, 1985-ci ildə hərbi xidməti başa vuraraq, vətənə qayıdır. Bir müddət sonra 1992-ci ildən cəbhəyə getməyi qərara alır.
776 saylı hərbi hissədə komandir təyin edilir. Bunula da Eldarın şərəfli döyüş yolu başlayır. 1992-ci il 15 mayda Şuşanın Zarıslı kəndində gedən ağır döyüşlərdə qəhrəmanlıq göstərir, sağ ayağından yaralanır, çoxlu qan itirdiyindən həyatını xilas etmək mümkün olmur.
Ailəli idi. Bir qızı yadigar qalıb.
Bakı şəhərinin Şəhidlər xiyabanında dəfn edilmişdir.
Yaşadığı binanın önünə xatirə lövhəsi vurulmuşdur.