Nazim Quliyev
Azərbaycan Respublikası Prezidentinin 8 oktyabr 1992-ci il tarixli 264 saylı fərmanı ilə Quliyev Nazim Qabil oğluna ölümündən sonra "Azərbaycanın Milli Qəhrəmanı" adı verilmişdir.
Quliyev Nazim Qabil oğlu 7 fevral 1965-ci ildə Beyləqan rayonunun Örənqala kəndində anadan olmuşdur. 1982-ci ildə kənd orta məktəbini bitirdikdən sonra hərbi xidmətə çağırılır.
Xidmətini başa vurduqdan sonra 2 saylı şərab zavoduna işə qəbul olunur. 1988-ci ildə Qarabağ münaqişəsi başlayanda Nazim silaha sarılaraq, özünümüdafiə dəstələrinin birində döyüşə yollanır.
1991-ci il aprel ayında Füzuli bölgəsində gedən döyüşdə fəal iştirak edir. Cuvarlı, Tuğ, Məlikcan, Arış, Divanlar və digər kəndlər uğrunda döyüşdə rəşadətlə vuruşur.
1992-ci il Köşbək kəndi uğrunda gedən döyüşdə qəhrəmanlıq göstərir, bir neçə yaralı yoldaşlarına köməklik göstərir. Düşmən gülləsi Nazimdən yan ötməyir. 27 yaşında qızğın döyüşlərin birində qəhrəmancasına həlak olur.
Subay idi.
Füzuli rayonu ərazisində dəfn edilmişdir. Füzuli rayonunun Yuxarı Yağləvənd və doğulduğu Örənqala kənd orta məktəbləri onun adını daşıyır.