Əvəz Ələkbərov

[Emine]

Əvəz Ələkbərov



Ələkbərov Əvəz Əkbər oğlu 1952-ci il iyulun 23-də anadan olmuşdur.

Ali təhsillidir, iqtisad elmləri doktorudur. 4 monoqrafiyanın və 40-dan çox məqalənin müəllifidir. Beynəlxalq Menecment Akademiyasının həqiqi üzvüdür.

1973-cü ildə D.Bünyadzadə adına Azərbaycan Xalq Təsərrüfatı İnstitutunu bitirərək iqtisadçı ixtisasını almışdır.

Əmək fəaliyyətinə 1973-cü ildə Bakı Baş Təmir-Tikinti Trestinin 10 saylı İxtisaslaşdırılmış Tikinti İdarəsində hesabdar kimi başlamışdır.

1973-1974-cü illərdə hərbi xidmətdə olmuşdur.

1975-1981-ci illərdə Azərkəndtikinti Nazirliyinin «Azərkəndquraşdırmatikinti» trestində iqtisadçı, baş iqtisadçı, Plan şöbəsinin rəisi, trest müdirinin iqtisadi məsələlər üzrə müavini işləmişdir.

1981-1984-cü illərdə Azərbaycan SSR Nazirlər Sovetinin İqtisadiyyat şöbəsində böyük referent, 1984-1991-ci illərdə isə həmin şöbənin müdir müavini vəzifələrində işləmişdir.

1991-ci ildə SSRİ Pensiya Fondunun Azərbaycan bölməsinin sədri, sonra isə Azərbaycan Respublikası Pensiya Fondunun İdarə Heyətinin sədri vəzifəsinə təyin olunmuşdur.

1992-1999-cu illərdə Azərbaycan Respublikası Dövlət Sosial Müdafiə Fondunun Sədri vəzifəsində işləmişdir.

1999-cu il iyulundan 2006-cı ilin aprelinə qədər Azərbaycan Respublikasının Maliyyə Naziri vəzifəsində işləmişdir. Yeni Azərbaycan Partiyası Siyasi Şurasının üzvüdür.

Azərbaycan–ABŞ Hökumətlərarası iqtisadi islahatlara və əməkdaşlığa dair ikitərəfli İşçi Qrupunun həmsədri olmuşdur.

Azərbaycan, Rus, və Türk dillərini mükəmməl bilir.

Ailəlidir, iki oğlu var.