Ermənistanın destruktiv mövqeyi ötən il Qarabağ münaqişəsinin həllinə imkan verməyib
Bu barədə Azərbaycan Xarici İşlər Nazirliyinin 2012-ci il üçün yekun mətbuat buraxılışında bildirilir
Ötən il Azərbaycanın xarici siyasəti üçün ən ümdə vəzifə ölkənin ərazi bütövlüyünün siyasi yolla bərpası məsələsi olub və bu məqsədlə rəsmi Bakı ATƏT-in Minsk Qrupu çərçivəsində aparılan siyasi prosesdə öz iştirakını davam etdirib.
APA-nın xəbərinə görə, bu barədə Azərbaycan Xarici İşlər Nazirliyinin (XİN) 2012-ci il üçün yekun mətbuat buraxılışında bildirilir.
XİN təəssüflə qeyd edib ki, Ermənistan destruktiv siyasətini davam etdirərək, məsələnin sülh yolu ilə həllinə imkan verməyib, münaqişə zonasında törətdiyi ciddi provokasiyaları ilə vəziyyəti daha da mürəkkəbləşdirməyə çalışıb: “Ermənistanın silahlı qüvvələrinin Azərbaycanın işğal edilmiş ərazilərində mövcudluğu münaqişənin həlli qarşısında duran əsas maneədir və Azərbaycan tərəfi bu məsələni danışıqlar zamanı əsas arqument kimi qaldırıb”.
Azərbaycan tərəfi 2012-ci ildə Ermənistan-Azərbaycan münaqişəsinin sülh yolu ilə həlli prosesi çərçivəsində Azərbaycanın ərazi bütövlüyü, suverenliyi və siyasi müstəqilliyinə, eləcə də münaqişənin bu prinsiplər əsasında həllinə beynəlxalq ictimaiyyətin dəstəyini əldə etmək məqsədilə diplomatik səylərini davam etdirib: “NATO-nun 2012-ci ilin may ayında Çikaqoda keçirilmiş sammitinin; Qoşulmama Hərəkatının 2012-ci ilin may ayında Şarm-əş-Şeyx şəhərində keçirilmiş xarici işlər nazirləri iclasının və 2012-ci ilin avqust ayında Tehranda keçirilmiş sammitinin; İslam Əməkdaşlıq Təşkilatının 2012-ci ilin avqust ayında Məkkədə keçirilmiş dördüncü fövqəladə Zirvə Toplantısının, 2012-ci ilin sentyabr ayında Nyu-York şəhərində və 2012-ci ilin oktyabr ayında Cibutidə keçirilmiş Xarici İşlər Nazirləri Şurasının iclaslarının; İqtisadi Əməkdaşlıq Təşkilatının 2012-ci ilin oktyabr ayında Bakıda keçirilmiş Zirvə Toplantısının yekun qərarlarında Azərbaycanın siyasi müstəqilliyi, suverenliyi və ərazi bütövlüyünə və münaqişənin bu prinsiplər çərçivəsində həllinə dəstək ifadə olunub”.
XİN-in rəyinə əsasən, 2012-ci ildə münaqişə həqiqətləri barədə beynəlxalq ictimaiyyətin məlumatlılıq səviyyəsi daha da artıb və bunun nəticəsində müxtəlif instansiyalarda münaqişənin bu və ya digər aspektlərinə münasibət bildirən qərarlar qəbul olunub: “Ermənistanın işğalçı siyasəti, onun azərbaycanlılara qarşı törətdiyi müharibə və insanlıq əleyhinə cinayətlər, o cümlədən Xocalı soyqırımı Meksika Senatının qəbul etdiyi qərarın ardınca İslam Əməkdaşlıq Təşkilatının Xarici İşlər Nazirləri Şurasının, Pakistan Senatının Xarici Əlaqələr Komitəsinin, Kolumbiya Senatının, ABŞ-ın Men və Corciya ştatlarının parlamentlərinin qəbul etdiyi sənədlərdə və eləcə də Nyu-Cersi ştatının qubernatorunun verdiyi bəyanatda pislənib”.