Pərvanə Məmmədli
Pərvanə Hacı qızı Məmmədli BDU-nun jurnalistika fakültəsini bitirib. Azərbaycanın Xarici Ölkələrlə Dostluq və Mədəni Əlaqələr Cəmiyyətinin (sonralar iki yerə: “Azərbaycan dünyası” və “Vətən” cəmiyyətlərinə ayrılıb) orqanı olan, üç əlifbada çıxan “Odlar yurdu” qəzetində və dünyanın müxtəlif ölkələrində 7 dildə yayımlanan “Azərbaycan bu gün” jurnalında ədəbi işçi, redaktor və baş redaktor vəzifələrində calışıb.
AMEA-nın Ədəbiyyat İnstitutunun aparıcı elmi işçisi, eyni zamanda BDU-nun jurnalistika fakültəsinin dosentidir. Filologiya üzrə fəlsəfə doktorudur.
Azərbaycan Yazıçılar və Jurnalistlər Birliklərinin üzvü, Həsən bəy Zərdabi mükafatı laureatıdır. Kültür, sənət, ədəbiyyat istiqamətli ”Ulu Çinar” jurnalı baş redaktorunun müavinidir.
Yerli və xarici mətbuatda Azərbaycan ədəbiyyat və mətbuat tarixi və b. ilə bağlı 100-dən artıq elmi-publisistik yazısı dərc olunub.
Tanınmış Güney Azərbaycan yazarları Həbib Sahir, doktor Məhəmmədtağı Zehtabi ilə bağlı kitabları ön söz, izah və şərhlərlə birgə nəşrə hazırlayaraq çap edib.
Kitabları:
1) “Varlıq“ jurnalında ədəbiyyat məsələləri (monoqrafiya, 2000),
2) Güney Azərbaycan (həmmüəllif; məlumat kitabı, 2000),
3) Cənubi Azərbaycan mətbuatı tarixi (2009 ).