Koroğlu Rəhimov
Azərbaycan Respublikası prezidentinin 16 sentyabr 1994-cü il tarixli 203 saylı fərmanı ilə Rəhimov Koroğlu İsmayıl oğluna ölümündən sonra "Azərbaycanın Milli Qəhrəmanı" adı verilmişdir.
Rəhimov Koroğlu İsmayıl oğlu 31 oktyabr 1953-cü ildə Oğuz rayonunun Xaçmaz kəndində anadan olmuşdur.
İlk təhsilini Yaqublu kənd orta məktəbində almış, sonra ailəsi ilə birlikdə Qərbi Azərbaycanın Zəngibasar mahalının Sarıcalılar kəndinə köçmüşdür. Təhsilini Həbil kənd orta məktəbində davam etdirmiş, 1969-cu ildə Azərbaycan Neft və Kimya İnstitutunun avtomexanika fakültəsinə daxil olmuşdur.
1972-ci ildə ordu sıralarına çağırılmışdır. 1974-cü ildə xidmətini Almaniya Demokratik Respublikasında başa vurduqdan sonra, yarımçıq qalmış təhsilini davam etdirdi. O, 1992 ci ildə könüllü olaraq Milli Ordu sıralarına yollanır. Goranboy rayonunun Buzluq, Çartaz və Erkəc kəndlərinin azad olunması uğrunda döyüşür.
1992-ci il 3 iyulda Ağdərə istiqamətində gedən döyüşdə Rəhimov qəhrəmancasına həlak oldu.
Ailəli idi. Üç övladı yadigar qalıb.
Bakı şəhərinin Şəhidlər xiyabanında dəfn edilmişdir.
Bakının şəhərinin Nərimanov rayonunda adına küçələ verilərək büstü qoyulmuş və Oğuz rayonunun Xaçmaz kəndindəki uşaq bağçası onun adını daşıyır.