Azərbaycanın məşhur ulduzları heyvanlarla pis rəftarın əleyhinədirlər - Video
Youtube video şəbəkəsində sahibsiz heyvanların müdafiəsinə həsr olunan ilk sosial videoçarx peyda olub.
Gün.Az-ın verdiyi xəbərə görə, sözügedən sosial çarx “BARS” Sahibsiz Heyvanların Müdafiəsi Təşkilatının təşəbbüsü ilə çəkilib.
Mərhəmətə ehtiyacı olan sevimliləri dəstəkləmək üçün Tünzalə Ağayeva, Samir Cavadzadə, Elnur Hüseynov, Diana Hacıyeva, Samira, Dilarə Kazımova, Aysel Məmmədova, Eldar Qasımov, İsfar Sarabski və Uran da bu layihəyə qoşulublar.
Həmçinin sosial çarxda məşhur aparıcı Murad Dadaşov, tanınmış yazıçı Elçin Səfərli və “NARGİS” jurnalının məsul redaktoru Könül Nağıyeva da həvəslə iştirak ediblər.
Uzun müddətdir ki, Bakı küçələrində sahibsiz itlərin güllə ilə vurularaq öldürülməsi halları şəhər sakinlərinin haqlı etirazı ilə qarşılanır. Mütəxəssislərin rəyinə görə, küçədəki heyvanların say artımının bu yolla tənzimlənməsi nəinki humanist addım deyil, həm də səmərəli nəticələr verməməkdədir.
Digər ölkələrin təcrübəsinə müraciət etsək, əminliklə deyə bilərik ki, sahibsiz itlərin sayının azaldılmasının yeganə səmərəli üsulu sığınacaqların yaradılması və küçə itlərinin sterilizə edilməsidir.
“BARS” sahibsiz heyvanların müdafiəsi təşkilatı artıq 3 ildir ki, fəaliyyət göstərir. Bu müddət ərzində bizə 4000-dən artıq xeyirxah insan qoşulub. Könüllülərimiz xəstə heyvanların qulluğunda dururlar, sahibsiz heyvanları ailələrə verə bilmək üçün çalışırlar, onların rahat həyat şərtlərində yaşamalarını təmin etməklə məşğul olurlar.
Bu sosial çarx ictimaiyyətin diqqətinin sahibsiz heyvanların problemlərinə cəlb edilməsinə yönəlib” - təşkilatın təsisçisi Leyla Axundova bildirib.
Alman filosofu Artur Şopenhauer deyib: “Heyvanlara mərhəmətlə yanaşmaq xeyirxahlıqla o qədər sıx bağlıdır ki, əminliklə demək mümkündür ki, heyvanlarla sərt davranan şəxs rəhmdil ola bilməz”.
Həqiqətən də, sizə təqdim etdiyimiz sosial çarxın özü də xeyirxahlıq və şəfqət saçır, bu parlaq işığı çəkilişin iştirakçıları bizim hər birimizlə məmnuniyyətlə paylaşırlar.