Hərb işi - Kamil Nəsibov

[Emine]

Kamil Nəsibov


Azərbaycan Respublikası prezidentinin 5 fevral 1993-cü il tarixli 457 saylı fərmanı ilə Nəsibov Kamil Baladə oğluna ölümündən sonra "Azərbaycanın Milli Qəhrəmanı" adı verilmişdir.

Nəsibov Kamil Baladə oğlu 8 oktyabr 1946-cı ildə Laçın rayonunun Bozlu kəndində anadan olmuşdur.

1963-cü ildə təhsilini Laçın rayonunun Minkənd kəndində bitirir və həmin ildə ordu sıralarına hərbi xidmətə çağırılır. Üç illik hərbi xidmətdən sonra vətənə qayıdır.

1973-cü ildə Azərbaycan Politexnik İnstitutuna daxil olur. Ali təhsilini başa vurduqdan sonra Minkənddə yerləşən Tikinti Materialları Bazasına müdir təyin edilir. Tez -tez ermənilər tərəfindən hücuma məruz qalan Laçın təhlükə qarşısında idi.

Özünümüdafiə dəstəsi yaradaraq rəhbərliyi öz üzərinə götürür və dəfələrlə kəşfiyyata çıxır. Fərəcan, Səfiyan, Çağazur, Malıbəy, Cicimli, Qızdərə kəndlərinin müdafiəsində böyük xidmətləri olmuşdur. Bu bölgələrin düşməndən təmizlənməsində də igidlik göstərmişdir.

29 iyun 1992-ci il "Qonaqgörməz" yüksəkliyi uğrunda gedən döyüşlərdə K. Nəsibov taqımı ilə hücuma keçir. Qızğın döyüşdə snayper yarası alan Kamil Nəsibov qəhrəmancasına həlak olur.

Ailəli idi. Dörd övladı yadigar qalıb.

Ağcabədi rayonunda dəfn edilmişdir.

Doğulduğu kənddəki Mədəniyyət evi onun adını daşıyır.