Zakir Məcidov
Azərbaycan Respublikası prezidentinin 14 sentyabr 1992-ci il tarixli 204 saylı fərmanı ilə Məcidov Zakir Nüsrət oğluna ölümündən sonra "Azərbaycanın Milli Qəhrəmanı" adı verilmişdir.
Məcidov Zakir Nüsrət oğlu 1956-cı il 26 iyunda Neftçala rayonunun Həsənabad qəsəbəsində anadan olub.
Təhsilini 70 saylı məktəbdə başa vurmuşdur. 1974-cü ildə Ryazan vilayətinin Sasovo şəhərinə gedərək Ali Hərbi Aviasiya məktəbinə daxil olmuşdur.
1977-ci ildə leytenant rütbəsi ilə məktəbi bitirmiş və Yevlax aviadəstəsində AN-2 təyyarəsinin ikinci pilotu kimi əmək fəaliyyətinə başlamışdır.
1980-ci ildə AN-2 təyyarəsinə komandir təyin edilmişdir. 1992-ci ilin fevral ayında 843 saylı hərbi hava hissəsində Mİ-24 vertolyotlarından birinə komandir təyin olunur. Həmin il Milli Ordunun sıralarına qatılmış, sərhəd bölgələrinə uçuşlar etmişdir.
Kasapet yüksəkliyində gedən ağır döyüşdə düşməni dəfələrlə zərbələrə məruz qoymuşdur. Dəfələrlə bu zonada düşmənlə üz - üzə qalan Z. Məcidov düşmən atəşinə tuş gəlir.
Ekipajı ilə birlikdə qəhrəmancasına həlak olur.
Ailəli idi. Bir övladı var.
Bakı şəhərinin Şəhidlər xiyabanında dəfn edilmişdir.