Bağırzadə Məmmədbağır Məmmədəli oğlu
Bağırzadə Məmmədbağır Məmmədəli oğlu (21.07.1950, Bakı, Nardaran k. - 30.10.2005, Bakı)
- xanəndə. Azərbaycanın xalq artisti (2000). Musiqi təhsilini ADMM-də Nəriman Əliyevin sinfində almış (1971-1975), ADMİU-da təhsilini davam etdirmişdir (1976-1980). Xanəndə kimi yetişməsində Bakının muğam mühiti, xüsusilə Bakı kəndlərindəki seir-muğam məclislərinin böyük əhəmiyyəti olmuş, Əlibaba Məmmədov, Yaqub Məmmədov kimi xanəndələrin yaradıcılığından bəhrələnmişdir.
Onun repertuarı muğamlardan, təsniflərdən və bəstəkar mahnılarından ibarət idi. M.Bağırzadə yaradıcı sənətkar olmuşdur. O, qəzəllər, şeirlər və onların əsasında bir çox mahnılar yaratmışdır (“Azərbaycanım”, “Ana dünyası”, “Qarabağ”, “Doymadım bu dünyadan” və s.). Həmin mahnılar xanəndələrin repertuarında yer tutmuşdur. M.Bağırzadənin ifası üçün ciddilik, sözün mənasını dərindən açmaq və dinləyiciyə çatdırmaq bacarığı xas idi. O, bütün muğam dəstgahlarını böyük məharətlə oxumuşdur. Səsyazıları AzRT-nın Fondunda saxlanılır, 10-dan artıq diski buraxılmışdır. “Dilkəş” ansamblı yaratmış, bu ansamblla dünyanın bir çox şəhərlərində qastrol səfərlərində olmuşdur. M.Bağırxadə 2001 ildən BMK-də fəaliyyət göstərmiş, muğam dərsləri demişdir.