Yalçın Nəsirov
Azərbaycan Respublikası prezidentinin 4 aprel 1995-ci il tarixli 307 saylı fərmanı ilə Nəsirov Yalçın Canhəsən oğluna ölümündən sonra "Azərbaycanın Milli Qəhrəmanı" adı verilmişdir.
Nəsirov Yalçın Canhəsən oğlu 23 yanvar 1976-cı ildə Astara rayonunun Sərək kəndində anadan olmuşdur.
1992-ci ildə onuncu sinfi bitirmiş, rayonda sürücü peşəsinə yiyələnmişdir. 1994-cü ildə Astara rayonu Hərbi Komissarlığı tərəfindən Milli Orduya çağırılmışdır.
2 ay Daxili qoşunların tərkibində hərbi təlim keçir, hərbi xidmətini Şamaxı və Tərtər rayonlarında davam etdirir. 1995-ci ilin məlum hadisələri başladı. Qarşıdurmanın qarşısına çıxan igid oğullarımızın sırasında N. Yalçın da vardı.
Martın 13-dən 17-ə kimi keçirilən əməliyyatlarda iştirak edib. 17-dən 18-ə keçən gecə ağır yaralanan Yalçını Sabunçu rayon xəstəxanasına çatdırırlar. Çoxlu qan itirdiyindən həkimlər onun həyatını xilas edə bilmir. İgid oğlumuz martın 24-də gözlərini əbədi olaraq yumur.
Subay idi.
Sərək kəndində dəfn edilmişdir.
Sərək kənd orta məktəbi onun adını daşıyır.
Astara rayonundakı "Qəhrəmanlar bağı" nda büstü qoyulmuşdur.