Gülçöhrə Məmmədova
Azərbaycan Memarlar İttifaqının katibi Gülçöhrə Hüseyn qızı Məmmədova 1953-cü ildə Qərbi Azərbaycanın Vedi rayonunda anadan olmuşdur.
1971-ci ildə Azərbaycan Politexnik institutunun Memarlıq fakültəsinə daxil olmuşdur.
1975-ci ilin sentyabr ayında G. H. Məmmədova yeni yaranmış Azərbaycan İnşaat mühəndisləri institutunun komsomol komitəsinin katibi seçilmiş, 1979-cu ilə qədər həmin vəzifədə işləmişdir.
1976-cı ildə Azərbaycan İnşaat mühəndisləri İnstitutunun Memarlıq fakültəsini bitirib, 1979-cu ildə həmin institutun "Memarlıq konstruksiyaları və abidələrin bərpası" kafedrasında assistent vəzifəsində işə başlamışdır.
1987-ci ildən həmin kafedranın baş müəllimi, 1991-ci ildən dosenti, 2000-ci ildən isə professorudur.
2000-ci ildən Azərbaycan Memarlıq və İnşaat Universitetinin rektoru vəzifəsində çalışır. G. H. Məmmədovanın elmi fəaliyyəti Qafqaz Albaniyasının memarlığı və Azərbaycan ərazisində xristian dini memarlığının tədqiqi ilə bağlıdır.
Bir çox abidələrin bərpa və elmi rekonstruksiya layihələrini işləmişdir. 1985-ci ildə "Qafqaz Albaniyasının erkən orta əsrlər xristian memarlığı" mövzusunda namizədlik dissertasiyasını, 1999-cu ildə "Qafqaz Albaniyasının dini memarlığı" mövzusunda doktorluq dissertasiyasını müdafiə etmişdir.
Bir çox beynəlxalq elmi konfranslarda məruzələrlə çıxış etmiş və bir sıra beynəlxalq layihələrə rəhbərlik etmişdir.
II çağırış 2000-2005-ci illər Azərbaycan Respublikası Milli Məclisinin deputatı olmuşdur.
Beynəlxalq Elmlər Akademiyası Şərqi Avropa bölməsinin və Şərq ölkələri Beynəlxalq memarlıq Akademiyasının həqiqi üzvüdür. 1985-ci ildən Memarlar İttifaqının üzvü, 2007-ci ildən Memarlar İttifaqı İdarə heyətinin katibidir. 2006-cı ildə "Respublikanın Əməkdar memarı" fəxri adına layiq görülmüşdür.
70-dən çox elmi əsərin, о cümlədən 2 monoqrafiyanın, 5 kitabın və 60-dan çox məqalələrin müəllifidir. Şəki rayonunda Kiş məbədinin, Qəbələ rayonunda Nic məbədinin, Qax rayonunda Qum bazilikasının bərpası, Bakıda "Şərq" MTK-nın 16 mərtəbəli yaşayış binası G. H. Məmmədovanın layihələri əsasında həyata keçirilmişdir.