Emil Ağayev

[Emine]

Ağayev Emil Güləli oğlu Emil Ağayev 11 oktyabr 1938-ci ildə Qazaxıstanın Çimkənd şəhərində ziyalı ailəsində anadan olmuşdur.

Publisist, ssenarist, tərcüməçi, 1974-cü ildən Azərbaycan Yazıçılar Birliyinin üzvü, Jurnalistlər Birliyinin üzvü, «Qızıl qələm » mükafatı laureatı.

Orta məktəbi bitirdikdən sonra ADU-nun filologiya fakültəsində təhsil almışdır (1956-1961). Dəvəçi rayonunun Pirəbədil kəndindəki 11 illik orta məktəbdə, sonra Abşeron rayonunun Gilgilçay qəsəbəsindəki 8 illik məktəbdə müəllimlik etmişdir. 1957-ci ildən mətbuat sahəsində çalışır.

Azərbaycan Dövlət Universitetinin aztirajlı qəzetində ədəbi işçi, "Molodyoj Azerbaydjana", "Vışka" qəzetlərində əvvəlcə mədəniyyət, sonra felyeton və oçerk şöbələrinə rəhbərlik etmiş, məsul katibin müavini olmuşdur.

"Literaturnaya qazeta"nın Azərbaycan üzrə xüsusi müxbiri (1971-1989) və APN (RİA "Novosti") agentliyinin Azərbaycan şöbəsinin müdiri vəzifələrində işləmişdir. "Yurd", "Qütb", "Populyar" jurnallarında (1987-1997), həmçinin Azərbaycan Ali Sovetinin redaksiya-nəşr şöbəsinin baş məsləhətçisi (1994-1995) olmuşdur.

Hazırda "Kavkaziya" analitik və informasiya agentliyinin (Münhen, AFR) müstəqil məsləhətçisidir. Azərbaycan Yazıçıları İttifaqı nəzdində oçerk və publisistika şurasının sədridir (1988-ci ildən). Sovet yazıçıları nümayəndə heyətinin tərkibində Polşa, Rumıniya, Bolqarıstanda simpozium və görüşlərdə iştirak etmişdir.

Bədii yaradıcılığında oçerk, esse, publisistik məqalələrlə yanaşı, Azərbaycan ədəbiyyatından rus dilinə tərcüməyə xüsusi diqqət yetirir. Onun tərcümə etdiyi ilk hekayə tələbəlik dövründə universitetin "Lenin tərbiyəsi uğrunda" çoxtirajlı qəzetində, ilk məqaləsi isə "Azərbaycan gəncləri" qəzetində çap olunmuşdur.

Mərkəzi və respublika dövri mətbuatında, almanax və məcmuələrində müntəzəm çıxış edir.

Onun ssenariləri əsasında bir sıra sənədli, həmçinin tammetrajlı bədii-publisistik "Semya-sem "ya"" (1982), "Ya jivu v Baku" (1985) və bədii "Rıtsari çernoqo ozera" (1984, S.Vəliyevin "Şor Cüllütü" əsəri əsasında) filmləri çəkilmişdir. ""Armyanskiy qenosid": mif i realnost" kitabının xüsusi redaktorudur.

2009-cu ildə "От Алиевa до Алиевa" kitabı işıq üzü görüb

Hazırda Turan İnformasiya Agentliyində bir sıra yazıları dərc olunur.