Uşaq mahnı Sözleri

[Azeribalasi]

Bahar

Sözləri Yusif Həsənbəyin,
Musiqisi Vasif Adıgözəlovundur.

Günəş doğdu,
Oyandı kənd.
Qızıl nura
Boyandı kənd.

Şəfəq düşdü
Narın-narın,
Üzərinə
Göy dağların.

Sürüləri
Yatağından,
Örüşlərə
Sürdü çoban.

Hamı çıxdı
Dəstə-dəstə,
Tarlalara
Bax, iş üstə.

[Azeribalasi]

Bahar gəlir

Sözləri Yusif Həsənbəyin,
Musiqisi Ramiz Mustafayevindir.

Bahar gəlir, yaşıl dona
Bürünür uca dağlar.
Dərələrdə axır yenə
Gur çeşmələr, bulaqlar.

Uzaq, qərib ölkələrdən,
Köçəri quşlar gəlir.
Yenə bahar ölkəsinə
Yaz gəlir, bahar gəlir.

Qızıl arı qonur qızıl
Ləçəyinə güllərin,
Bahar varı, dövlətidir,
Sərvətidir ellərin.

[Azeribalasi]

Balaca kapitan

Sözləri Cahangir Məmmədovun,
Musiqisi Ağabacı Rzayevanındır.

Vannaya tökdüyüm su
Dəniz tək ləpələnir.
Mənim balaca gəmim
Gah qalxır, gah da enir.

Budur, fit verib bərkdən – dü!
Suları yara-yara.
Ayrılaraq sahildən – du!
Gedir çox uzaqlara.

Gəmi göyərtəsində
Dayanmışdır matroslar.
Onlara geydirmişəm
Qızıl düyməli paltar.

Ey matros! Möhkəm dayan – du!
Möhkəm saxla sükanı.
Bax, belə əmr eyləyir – du!
Gəminin kapitanı.

[Azeribalasi]

Balaca neftçiyəm

Sözləri Rəfiq Zəkanın,
Musiqisi Telman Hacıyevindir.

Neftçidir mənim atam,
Işləyir yorulmadan
Xəzərin qucağında.
Döşündə nişanı var,
Onu hamı tanıyır
Abşeron torpağında.

Neft çıxarır sulardan,
Deyir: “Kərək hər insan
Bağlı olsun vətənə!”
Atamın bu sənəti,
Işinə məhəbbəti
Yaman xoş gəlir mənə.

Hərdən söz düşən zaman,
Ya bir qız, ya bir oğlan
Soruşur nəçiyəm mən?
Baxıb gülümsəyirəm,
Uşaqlara deyirəm:
“Balaca neftçiyəm mən”.

[Azeribalasi]

Balaca ovçu

Sözləri Hikmət Ziyanın,
Musiqisi Oqtay Zülfüqarovundur.

Səhər açılan kimi,
Götürdüm tüfəngimi.
Yol açdım göy meşəyə,
Baş çəkdim hər guşəyə.

Birdən səs eşitdim mən
Gördüm tülküdür gələn.
Dedim: - bir də yeməzsən
Toyuq-cücələri sən!
Tüfəngimi doldurdum,
Tülkünü vurdum.

Ceyran gördüm atmadım,
Dovşan gördüm atmadım...
Neçə təpədən aşdım,
Hər tərəfi dolaşdım.

Birdən səs eşitdim mən,
Gördüm boz qurdlar gələn.
Dedim: - Bir də yeməzsən
Qoyun-quzuları sən!
Tüfəngimi doldurdum
Boz qurdu vurdum.

[Azeribalasi]

Bip-bipin nəğməsi

Sözləri Teymur Elçinin,
Musiqisi Fikrət Əmirovundur.

Uçdu göylərə
Bizim peykimiz,
Söylədi yerə:
-Yol gedirik biz.
Bip-bip, bip-bip,
Göylər min rəngdir,
Burda ulduzlar
Gör nə qəşəngdir.

Günəşdən, Aydan
Salam var sizə,
Nəğmə deyirəm
Uşaqlar, sizə.
Bip-bip, bip-bip,
Dərindir göylər,
Burda hər ulduz
Min nağıl söylər.

Uçuram Marsa
Dalımca baxın,
Ulduzlar mənə
Yaxındır, yaxın.
Bip-bip, bip-bip,
Gözləyin bir az,
Görüşərik biz
Darıxmaq olmaz.
Bip-bip, bip-bip!

[Azeribalasi]

Bizim Bakı metrosu

Sözləri Hikmət Ziyanın,
Musiqisi Ağabacı Rzayevanındır.

Gülər üzlü Bakının,
Şirin sözlü Bakının,
Xəzər gözlü Bakının
Arzusuydu, arzusu
Bizim Bakı metrosu,
Bizim Bakı metrosu.

Yer altında işıqlı,
Bəzəkli, yaraşıqlı,
Çiçəkli, sarmaşıqlı
Bir şəhərdir doğrusu
Bizim Bakı metrosu,
Bizim Bakı metrosu.

Sübh çağı, gecəyarı,
Gör neçə səmtə sarı
Şütüyür qatarları,
Gah gurlayır, gah susur,
Bizim Bakı metrosu,
Bizim Bakı metrosu.

Enib, qalxır pillələr,
Fərəhim dünya qədər...
Qoy səni mən bəxtəvər
Gəzim Bakı metrosu,
Bizim Bakı metrosu,
Bizim Bakı metrosu.

[Azeribalasi]

Bizim gəmi

Sözləri Cahangir Məmmədovun,
Musiqisi Ağabacı Rzayevanındır.

Bizim şən bağçamızda,
Böyük gəmimiz vardır.
Sükançısı Nəriman,
Kapitanı Eldardır.

Oturub bu gəmidə
Biz gəzirik hər yeri.
Uzaqlardan görürük
Işıqlı sahilləri.

Burda hər bir sərnişin
Adlı-sanlı işçidir.
Dənizdən neft çıxaran
Mühəndisdir, neftçidir.

Motorlar guruldayır,
Sürət bir az da artır;
Hamı öz iş yerinə
Vaxtında gəlib çatır.

[Azeribalasi]

Bizim həyət

Sözləri Teymur Elçinin,
Musiqisi Fikrət Əmirovundur.

Bizim həyətdə
Yüz uşaq var.
Bir-birini
Çox sevir onlar.
Böyük meydandır
Bizim həyət,
Qaynar qazandır
Bizim həyət.

Nəqərat:

Bax, bax, nə gözəldir
Bizim həyət.
Gəl, bax nə gözəldir
Bizim həyət.

Uca evləri
Nə göyçəkdir,
Onun dörd yanı
Gül-çiçəkdir.
Gömgöy dənizdir
Bizim həyət
Hər vaxt təmizdir
Bizim həyət.

Nəqərat.

Dərsdən, bağçadan
Gələndə biz,
Gülür, oynayır
Həyətimiz.
Qoşur nəğmələr
Bizim həyət,
Hər gün, hər səhər
Bizim həyət.

Nəqərat.

[Azeribalasi]

Buzov

Sözləri Cahangir Məmmədovun,
Musiqisi Ağabacı Rzayevanındır.

Buzovum çox qəşəngdir,
Rəngi ala-buladır.
Təzəcə durub gəzir,
Axı hələ baladır.

Ay gözəl buzovum,
Yaxın, gəl, buzovum.

Su içmək istədi o,
Yaxınlaşdı bulağa,
Suda görçək şəklini
Qorxub qaçdı uzağa...

Ay gözəl buzovum,
Yaxın gəl, buzovum.