Azerbaycan Gülxar Həsənova
Uca boyu, səhnədən yaraşıqlı görünən qədd-qaməti, soprano səsinin sanki nəhayətsiz zəngulələri ilə opera solistləri arasında layiqli yer tutub.
Gülxar İbrahim qızı Həsənova (Sultanova)10 dekabr 1918-ci ildə Şəmkir rayonunun Bayramlı kəndində anadan olub. Oxumağa məktəb yaşlarından başlayıb.Bakı Tibb Məktəbində (1934) təhsil alıb və oranın dram dərnəyində çalışıb. Bakı Teatr Məktəbində aktyorluq ixtisasma yiyələnib (1936-1939). Bir müddət GTT-də aktrisalıq edib. Tamaşalarda müğənnilik məharətini nümayiş etdirən aktrisa 1942-ci ildə ADOBT-ə dəvət alıb. Uzun illər teatrın solisti olan sənətkar 1980-ci ildən kollektivin opera truppasında məşqçi-pedaqoqdur.
Gülxar Həsənova müxtəlif rejissorların üslub baxımından ayrı-ayrı quruluşlarında "Leyli və Məcnun" (Leyli və Leylinin anası), "Əsli və Kərəm" (Əsli), "Koroğlu" (Xanəndə qız), "Aşıq Qərib" (Şahsənəm), "Şah İsmayıl" (Ərəb Zəngi), "Bahadır və Sona" (Təravət xanım), "Azad" (İranlı qız),"Gəlin qayası" (Camalın anası) operalarında, "Arşın mal alan" (Gülçöhrə, Telli və Cahan xala), "Durna" (Lalə) operettalarında çıxış edib.
Azərbaycan Respublikasının əməkdar artisti (30 aprel 1955) və xalq artisti (1 dekabr 1982) fəxri adları ilə təltif olunub.
Mənbə: İlham Rəhimli "Azərbaycan teatr tarixi"