23.10.2008
BMT BAŞ KATİBİNDƏN GÜNEY AZƏRBAYCANA DƏSTƏK GƏLDİ
Birləşmiş Millətlər Təşkilatının baş katibi Pan Ki Mun İranda insan haqlarının vəziyyətindən narahat olduğunu bildirib. Baş katib bəyanatında deyib ki, bu ölkədə bəhaiçili dini azlıq nümayəndələrinin çoxsaylı hüquqları pozulur, onlar ədalətsiz məhkəmə qərarları, mülkiyyətlərinin məhv edilməsi ilə üzləşir, ali təhsil almalarına imkan verilmir.
“Olaylar”ın xəbərinə görə, Pan Ki Mun bununla bağlı İranda təcili olaraq islahatların aparılması zərurətinin olduğunu vurğulayıb və bu ölkədə ən böyük etnik azlıq hesab edilən azərbaycanlıların hüquqlarının pozulduğunu diqqətə çatdırıb: “Ana dilində təhsil və tarixi-mədəniyyət günlərinin keçirilməsini istəyən azərbaycanlı fəallar həbs edilir, təqiblərə məruz qalır. Beynəlxalq insan hüquqları təşkilatları fəalların həbsini pisləyir və onları vicdan məhbusu elan edir”.
-
20.10.2008
TEHRAN GÜNEYDƏKI FƏLAKƏTLƏ BAĞLI TƏDBİR GÖRMÜR
3 nəfəri sel aparıb
Güney Azərbaycan türklərinə qarşı basqılar davam edir. Meşkinin hakimiyyət orqanları milli hərəkat fəalı Tarverdi Əkinçioğluna təzyiq edirlər. GAMOH-un Quzey Azərbaycan təmsilçiliyindən verilən məlumata görə, hərəkatçını dəfələrlə ETTELAAT-a çağırıblar. Mənəvi və psixoloji işgəncələrə məruz qalan hərəkatçıya bildiriblər ki, yaxın günlərdə onun işinə İnqilab Məhkəməsində baxılacaq.
Ötən həftə Güney Azərbaycan ərazilərinə düşən güclü yağış güneyli qardaşlarımıza ciddi ziyan vurub. Bununla yanaşı, insan tələfatı da qeydə alınıb. Maku şəhərində üç həmvətənimizi sel aparıb. İran hakimiyyəti isə Azərbaycan şəhərlərində yaranmış fəlakətli durumun aradan qaldırılması üçün heç bir tədbir görmür. Bu da soydaşlarımızın etirazına səbəb olub. Maku şəhərində İran rejiminin antitürk siyasətinə etiraz əlaməti olaraq aksiya da keçirilib. Qeyd edək ki, güneydəki daşqınlar Quzey Azərbaycanın cənub rayonlarında güclü yağışların yağdığı günlərdə baş verib.
Menbe: Musavat Qezeti.