O SEVDA DILƏNİR...
-------------------------
Hələ mənzil uzaq, hələ yol yarı,
Tərəddüd etmə, seç dövləti, varı
Qız, yolun onadır, get ona sarı,
O sevda dilənir, mən dilənmirəm.
Bax, necə eşqinə bir izah çəkib,
Sən keçən yollara bağça- bağ çəkib,
O hər gün yağmura dönür ah çəkib,
Yoluna çilənir, mən çilənmirəm.
O bilmir nə keçir sənin içindən,
Saflıq qoymur seçə mələyi cindən,
Sənin sevgi adlı o süsgəcindən,
O keçir, ələnir, mən ələnmirəm.
Demə taleyimin yox vəfası da,
Mənsiz günlərində tutma yası da,
Bir səbəb axtarma, ən əsası da,
O sənə güvənir, mən güvənmirəm.